Pa un Harmonia Psicologico!

Harmonia Psicologico: Ayudo psicologico pa un miho calidad di bida.

Si bo yiu tin problema den comportacion y bo no sa kico pa haci mas, tuma contacto pa por haya guia di un profesional cu estudio y experiencia di traha cu mucha y adolescente. 

E problema den comportacion por ta relata na problema den regulacion di emocion, depresion, ansiedad, trauma, pensamentonan suicidal, autismo of ADHD. 

Ora abo como mayor ta comprende kico ta pasando cu bo yiu, bo lo sa miho con pa anda cu e comportacion.

Pa e tipo di tratamento tambe ta importante pa sa kico ta e causa di e problematica. Ta traha cu diferente forma di tratamento efectivo manera CGT, EMDR, Imaginaire exposure, Imaginaire Rescripting, Theraplay  y Schematherapie.

Ora mayornan no ta riba e mesun linja di educacion ta haci efecto riba e mucha/adolescente su estado mental y su desaroyo. Por acudi pa ayudo pa guia di mayornan.

Ta traha cu adulto den caso di trauma singular, especialmente cu trauma di parto of perdida di baby/yiu. Tambe un trauma singular por encera un accident grave unda a keda cu miedo, trauma medico, desaster natural of un atake fisico.

INTRODUCCION

Bon bini na e website di e practica priva Harmonia Psicologico di Adaline Rasmijn, GZ-psycholoog & Cognitief Gedragstherapeut i.o.

Semper mi tabata pasiona pa husticia y derechonan humano. Mi a dicidi di bira psicologo pa haci un diferencia den e bida di muchanan y nan famianan den e banda di prevencion mirando cu ta conoci cu problemanan den salud mental por empeora cu tempo, si no ricibi ayudo. Pa e motibo aki na 2014 mi a termina e Masters Psychologie en Gezondheid, track Kinder- en Jeugd Psychologie na Universiteit van Tilburg. Mi experiencia di e ultimo añanan tabata haciendo procesamento di trauma den practica priva, haci diagnostiek na centro multidisciplinario y por ultimo haciendo diagnostiek y tratamento na polikliniek kinder- en jeugdpsychiatrie. Na 2019, ami y otro 19 psicologo den Caribe, a cuminsa cu e prome GZ-opleiding den nos area. Desde 2022 mi tin e titulo di GZ-psycholoog, esaki kiermen cu mi ta mara na e tuchtrecht di Hulanda y cu mi por haci un officiële diagnose, pa por ehempel autismo of ADHD y tambe por ofrece tratamento specialisa.

Como psicologo specialisa den e desaroyo di mucha, mi ta traha preventivo door di haci screening pa problemanan den desaroyo prome cu 4 aña. Tambe trahando cu mucha y adolescente, mi ta traha hopi cerca cu e famia y scolnan. Hunto nos por haci e diferencia den mucha nan bida y futuro.